Дезинформација бр:
#183
Дата:
29.06.2020
Извор:
kolozeg.info
Време на читање:
3 мин.
Оригинален наслов: Не Постојат Тестови за КОВИД-19! Глобалофашистите ги Ставаат Народите во Домашен Затвор со Лажни Бројки!
Порталот Коложег.Инфо објави текст со наслов Не Постојат Тестови за КОВИД-19! Глобалофашистите ги Ставаат Народите во Домашен Затвор со Лажни Бројки! Повикувајќи се на наводно длабоката анализа на Ковид -19 тестовите објавена од Здружението “Од Нас за Нас” во текстот вели дека тоа само го потврдува она што светската фармаколошка индустрија и СЗО а и глобало-фашистичките влади кои ги затворија своите народи во домашен затвор, никогаш не го ни спореле, дека тест за Ковид не постои и се користат општи генерички тестови кои откриваат респираторни проблеми кои можат да бидат од десетици други причини, и дека бројките со кои се оправдува апсењето на народите и уривањето на економиите и правото на луѓето да се прехранат се понедоверливи од гатање на бајачка.
Линк до оригиналниот текст може да најдете тука.
Изнесеното тврдење не е точно и претставува сериозно манипулирање со јавноста, на штета по здравјето на луѓето.
Она што треба јавноста да знае и да не дозволи да биде манипулира е следново :
Коронавирусот постои
Доказ за тоа се над 11 милиони заразени случаи низ светот, во моментот и над 500 илјади починати од коронавирус. Пандемијата беше прогласена од СЗО на 12 ти март 2020 година.
Постојат тестови за Ковид-19
Присуството на вирусот во телото на човекот се утврдува преку два теста. PCR или молекуларен тест, и серолошки тест односно тест за антитела.
Во моментот низ светот најмногу се користат таканаречените PCR тестови кои што покажуваат дали лицето е заразено во моментот.
Додека пак, серолошки тест е тест за антитела кој покажува дали лицето веќе било инфицирано со вирусот SARS-CоV-2. Со нивна помош се утврдува дали постојат специфични антитела, имуноглобулини IgМ и IgG, кои имунолошкиот систем ги создал против вирусот.
Американската Администрација за храна и лекови (FDA) исто така дава јасни објаснувања за видовите на тестови што постојат и во кои случаи се користат.
Јасно е дека целта на овој текст е да се наведат читателите на незадоволство против институициите кои наводно нѐ лажат за вистината за коронавирусот, што пак, е неточно и манипулативно тврдење. Авторот со умисла ја поттикнува недовербата на граѓаните кон институциите на системот, а тоа во случајот може да резултира со огромна штета на јавното здравје.
Да им оставиме на научниците да се занимаваат со своите научни истражувања и достигнувања. Нивните напори во насока на справување со коронавирусот не треба да се злупотребуваат во новинарски текстови за манипулирање на јавноста.
Реалноста за жал е таа вирусот сепак постои, но постојат и тестови.
Наша должност како граѓани е да се заштитиме и да ги заштитиме нашите најблиски, почитувајќи ги сите здравствени препораки и заштитни мерки.
